About Usहाम्रा गुरु एवं मार्गदर्शक
आराध्यदेव श्री पशुपतिनाथ मन्दिर परिसर वनकाली क्षेत्रमा विश्वकै पञ्चम मूलजगद्गुरु श्री कृपालु जी महाराजका एकमात्र नेपाली प्रचारक राष्ट्रित सन्त स्वामी श्री हरिदासजीको दूरदर्शिता, परिकल्पना, समर्पण र निर्देशनमा साधकजनहरु कै योगदानमा श्री राधा माधशव समिति नेपालबाट निर्मित श्री कृपालु उद्यान एक अद्वितीय आध्यात्मिक, मनोरम र प्राकृतिक स्थल हो । यसको मुख्य उद्देश्य प्रकृति संरक्षण गर्दै मानव जीवनमा दया, करुणा, शान्ति र भक्तिभाव प्रवाह गर्नु हो । यो स्थान केवल एउटा बगैँचा वा मन्दिर मात्र नभई, आत्मा शुद्ध पार्ने, मनलाई शान्त पार्ने र जनसमुदायलाई एकताबद्ध गर्ने पवित्र स्थलको रूपमा परिकल्पना र विकास गरिएको छ। शान्त प्राकृतिक वातावरण, सुन्दर बगैँचा, हरियाली, सुव्यवस्थित धार्मिक आध्यात्मिक सरजनाहरु सहितको दिव्य परिसर र ध्यान गर्ने खुला ठाउँले यहाँ आउने प्रत्येक आगन्तुकलाई आत्मिक सुखानुभूति गराउँदछ । यहाँको स्वच्छ वातावरणले मानिसलाई विशेष गरी शहरी जीवनका दैनन्दिन तनावहरूबाट टाढा राखी शारीरिक, मानसिक शान्ति प्रदान गर्नुका साथै आत्मसमीक्षा, प्रार्थना र आध्यात्मिक चिन्तनमा निमग्न हुन सहज बनाउँछ। कृपालु उद्यानको निर्माण सांस्कृतिक, धार्मिक र प्राकृतिक मूल्य मान्यताहरूको संरक्षण; संवर्द्धन गर्ने उद्देश्यले गरिएको हो। यसले विभिन्न उमेर र पृष्ठभूमिका मानिसलाई आत्मिक रूपमा जोड्ने पुलको काम गर्दछ। भगवद् क्षेत्रमा अघि बढ्न प्रेरित गर्दछ । कृपालु उद्यानमा आउने प्रत्येक आगन्तुकले यहाँ शान्ति, श्रद्धा र जीवनप्रति नयाँ दृष्टिकोण अनुभव गर्दछन्। यसकारण कृपालु उद्यानलाई आध्यात्मिक घर, शान्तिको केन्द्र र संस्कृतिको संरक्षक पवित्र स्थलका रूपमा चिनिन्छ । यस युगका पञ्चम मूलजगद्गुरुत्तम श्री कृपालु जी महाराजको स्मृतिमा उहाँका नेपाली प्रचारक राष्ट्रिय सन्त स्वामी श्री हरिदासजीको परिकल्पना र प्रेरणाबाट श्री पशुपति क्षेत्र विकास कोषको स्वीकृतिमा श्री राधा माधव समिति नेपालबाट यस उद्यानको निर्माण गरी भगवान श्री पशुपतिनाथमा समर्पण गरिएको हो । यस पुण्य भुमिमा अवलोकन भ्रमण गर्नु हुने सबै श्रद्धालु भक्तजनहरुमा यस सम्पदाको सम्भार, संरक्षण तथा विकासमा सल्लाह, सुझाव तथा सहयोगका साथै भएपुर आध्यात्मिक लाभ लिनु हुन अनुरोध गर्दछौं । जय श्री राधे !
